Klaksvíkar Fimleikafelag vunnið heiðurin sum 'Ársins Stjørnuskot'
Hetta er fyrstuferð í søguni, at Klaksvíkar Fimleikafelag hevur eitt estetiskt fimleikalið við í heimligu kappingini í Føroyum. Í gjárskvøldið, 17. juni, var fimleikagalla í Bylgjuni í Runavík. Sum vera man, so vórðu tilnevningar og heiðursvinnarar á skránni.
Millum tey tilnevndu til 'Ársins Stjørnuskot 2022' vóru: Pinkuliðið Aura úr Klaksvíkar Fimleikafelagi, gentuliðið Svalan úr fimleikafelagnum Støkk og einstaklingur Mia Højgaard, úr Havnar Fimleikafelagi.
Enn einaferð gjørdu norðoyingar frambrot á føroyska ítróttarpallinum. Enn einaferð í fimleiki! Føroya Fimleikasamband skrivar:
Hetta er fyrsta árið, at felagið hevur eitt estetiskt lið við í kappingini. Pinkurnar hava ígjøgnum árið støðugt ment seg og endaðu árið við einum flottum úrsliti. Tær blivu nomineraðar á fleiri heiðrum, og er hetta sera flott hjá einum so nýggjum liði. Vit eru tí øll samd um, at tær skulu fáa heiðurin sum 'Ársins Stjørnuskot 2022'.
Og vinnarin av 'Ársins Stjørnuskoti 2022' eru..
PINKUR AURA ÚR KLAKSVÍKAR FIMLEIKAFELAG!
Vit á Norðlýsinum ynskja liðnum, venjara, foreldrum og stuðlum, hjartaliga til lukku við søguliga úrslitinum!