Lýsing
Fyrikomandi og blíði skiparin á Rituni, Árni Joensen, gevst fyri aldur sum skipari. | Mynd: Dávur Winther

Árni gevst

SKRIVAÐ: Tekst og myndir: Dávur Winther  |  21.06.2022 - 14:40 Mentan Tíðindi Vinna

Fyrikomandi og blíði skiparin á Rituni, Árni Joensen úr Oyndarfirði, gevst fyri aldur sum skipari.

Komandi mánadagin, 4. juli fyllir Árni 70 ár, og gevst hann tá eftir smáum sjey árum sum skipari fyri Strandfaraskip Landsins. Seinasti dagur á vaktini er komandi hósdag.

Árni gekk í real í Fuglafirði, haðani eg minnist hann og tvillingsbróðurin, Hjalta. Eftir real fór Árni sum ungur við Stellu Karinu, til hann hevði fingið siglingstíð og nakað afturat.

Síðani fór hann uppá skiparaskúla í Havn, sum hann var liðugur við í 1973. Hann sigldi nakað úti, men fór so til Grønlands á rækjuveiðu við Logos úr Gøtu eitt stutt skiftið og seinni við Karinu hjá Trygva Laksafoss.

Pól á Biskupsstøð var ommubeiggi Árna – so pápin, Sigurð og Erling, Trygvi og Hallur Laksafoss vóru systkinabørn.

Árni hevur síðani verið nógv á sjónum, seks ár skipari við Cuba-bátunum, verið í Noregi og Skotlandi sum yvirmaður við fiskiskipum.

Eisini hevur Árni verið sølumaður á Føroya Fiskasølu í tíggju ár og síðani sølumaður fyri Vesturvón í tíggju ár.

Hesi seinnu næstan sjey árini hevur Árni verið skipari á Rituni og siglt til Svínoyar og Fugloyar at kalla hvønn dag, tá ið hann hevur verið á vakt.

Árni letur væl at betraðu umstøðunum við havnaviðurskiftunum á Eiðnum, har atløgubryggjan er hækkað, longd og hevur fingið ein verjugarð.

Hetta hevur gjørt, at tað er munandi betri at leggja at og nógvir dagar, sum fyrr vóru ivadagar vegna veður, ber væl til at leggja at, sum lættir væl um, heldur enn at sigla á Víkina, ið longir munandi um ferðina.

Hin skiparin, Jógvan Páll Poulsen, sum er ættaður av Kirkju, men búsitandi í Klaksvík, gevst eisini fyri aldur. So tá ið henda vaktin er av komandi hósdag, fara tveir skiparar í land – Jógvan Páll Poulsen og Árni Joensen.

Árni tekur saman um, at helvtina av sínum vaksna lívi hevur hann verið á sjónum og hina helvtina á landi - tó við tilknýti til sjógvin. Tað verður bara gott, ikki at skula halda seg til ein kallendara alla tíðina, men verða sín egni harri einaferð, sigur Árni Joensen, skjótt fyrrverandi skipari á Rituni við einum smíli, sum hann eigur nógv av.

Lýsing
Seinastu tíðindini
Veðrið í vikuni
Sjómannadagur í familjun­nar tekni
Gadus siglir heim
Tryggur 2-0 sigur til KÍ á AB
Beautemps-Beaupré úr Føroyum gjøgnum Djú…
Munandi betri avrik hjá flogbóltsmonnunu…
Føroya Sjómannadagur, skráin fyri 15.-20…
Meira um Húsarhaldsskúlan 
Upptakt: AB-KÍ
Rennibreytin tekur skap
Føroya Sjómannadagur mánadagin
Dagføring: Streymslit um alt meginøkið
Elnetið niðri - í besta veðri
AB-KÍ er fluttur tveir tímar
Opið bræv til Fótbóltsamb­andi um dystars…
Kom við á Føroya størstu og einastu staf…
Barsilsbólkur til tey við rúsbundnum f…
Verið varin í ferðsluni, nú skúlarnir by…
Flogbóltsmennir­nir á veg til Estlands
Framløga: Fornminni fram við sjóvamálan