Hósdagin verður síðsti FM-róðurin í ár, tá ólavsøkuróðurin er á skránni. Hjá 10-mannaførum skal ganga heilt galið, um Klaksvíkingur ikki skal vinna FM. Tí hann skal bara koma á mál uttan at blíva kolldømdur fyri at tryggja sær FM 2022.

10 FM við 10-mannaførum til Janus

Um Klaksvíkingur vinnur FM, so seta tveir av rógvarunum met. Janus-Dam Jacobsen hevur vunnið FM við 10-mannaførum við Klaksvíkingi í 2006, 2009, 2011, 2012, 2013 og 2015. Við Eysturoyingi í 2007 og Orminum Langa í 2018 og 2019. Í løtuni eru tað Janus og Svein Rógvi Nielsen Ljósstein, sum hava vunnið flest FM hjá 10-mannaførum. Men Janus kann nú blíva tann fyrsti at vinna 10 FM við 10-mannaførum í føroyskari kappróðrarsøgu.

Átta FM við sama báti til Magnus

Magnus Norðberg kann eisini seta eitt met hjá 10-mannaførum, sum hann frammanundan hevur saman við tveimum øðrum. Í løtuni hava Magnus Norðberg(Klaksvíkingur), Ludvík við Stein (Eysturoyingur) og Karl Olivar Bærentsen (Havnarbáturin) vunnið sjey FM við sama báti hjá 10-mannaførum. Magnus kann nú blíva tann fyrsti at vinna átta FM við sama báti hjá 10-mannaførum í føroyskari kappróðrarsøgu.