Veðrið um vikuskiftið
Vit hava havt høgætt við køldum luftráki inn yvir oyggjarnar í tveir. Tað verður broytt í vikuskiftinum.
Lágtrýstið, sum hevur staðið eystan fyri Føroyar og hevur givið okkum hetta kalda veðrið, fer at flyta seg longur burtur frá okkum og missa sína mátt her hjá okkum.
Ístaðin fyri kemur eitt annað lágtrýst vestaneftir og nærkast Føroyum. Tað fer at liggja nær við Ísland, og tí fer ættin at liggja ímillum sunnan og útsynning í vikuskiftinum. Nógv regn hongur uppi í hesum lágtrýsti, og tað fara vit eisini at merkja í vikuskiftinum.
Taka vit veðrið meira ítøkiligt, so er enn køld høgætt, nú tað er middagur – einir 5 til 10 m/s av útnyrðingi. Tað er samdrigið ella skýggjað, fyri tað mesta turt, tó er ælaveður í støðum.
Soleiðis fer at vera allan dag. Seint í kvøld fer vindurin at minka niður í lítið og einki, meðan ættin gongur niður í útsynning.
Fyrrapartin í morgin fer vindurin at veksa spakuliga. Á middegi eru 5 til 10 m/s. Fyrrapartin í morgin fáa vit eisini ælaveður og út á seinnapartin fer at regna, og tað regnar restina av degnum og líka til middags sunnudagin. Annars er sama ætt restina av leygardegnum, útsynningur, og næstan vindferð, 5 til 10 m/s, onkra løtu 8 til 13 m/s.
Sunnunáttina lækkar hann niður í sunnan, og vindurin fer at veksa. Fyrrapartin er vindferðin eina løtu 15 til 20 m/s. Á middegi støkkur hann vesturum, vindurin minkar niður aftur í 10 til 15 m/s, samregnið heldur uppat. Eftir tað er ein skái er í nakrar tímar við ælingum.
Um kvøldið fer vindurin aftur at veksa, og tað fer at regna. Á midnátt eru 15 til 20 m/s av vestri.
Keðiligt veður mánanáttina, 15 til 20 m/s av vestri og so av útnyrðingi fram ímóti morgni.