Háenni var smíðaður í Fåborg í 1946, og sama árið keyptu fýra viðingar bátin til Føroya. Í 1954 fer báturin undir hamaran, og tá keyptu Seglhúsmenninir hann frá Fútarættinum. Tey fyrstu árini var báturin til ymsan fiskiskap, men tey seinnu árini mestsum bara til línufiskiskap undir Føroyum. Byrgingin um Haraldsund var alment tikin í nýtslu í 1986, so myndin er tikin áðrenn tað.

Háenni var í 38 ár í reiðarínum hjá Joensen & Olsen, men tá alt virksemið hjá teimum fór á húsagang í 1992, keypti Føroya Banki bátin í Fútarættinum. Stutt eftir keypti Poul Jacob Joensen, skipari í Klaksvík bátin frá bankanum fyri 900 000 krónur. Poul Jacob hevði frammanundan ført sluppina Esther, sum var tiltikið gott fiskiskip, og sum so at siga bara royndi eftir upsa við snellu. Háenni hevði frammanundan roynt við línu undir Føroyum, og tað var eisini ætlanin hjá nýggja eigaranum.

Í 2009 varð Háenni seldur suður á Tvøroyri, og har fekk hann navnið Tanganes. Tvøramenn brúktu bátin at royna við snellu eftir upsa undir Føroyum. Vanliga vóru tríggir menn við bátinum, og hvør túrur vardi vanliga tríggjar dagar.

Tá teir ein dagin á vári í 2010 vóru staddir 13 fjórðingar norður úr Mýlingi, fór báturin at leka, og teir kláraði ikki sjálvir at halda hann lens. Brimil fór teimum til hjálpar, og menn av Brimli fóru umborð við pumpum, sum kundu halda bátin flótandi.Tískil kundi Tanganes sigla saman við Brimli á Klaksvík. Tað vísti seg, at lekin var við síðuna av stevninum omanfyri vatngangin, so tað var ikki neyðugt at taka bátin upp á beding fyri at tetta lekan.

Í 2012 varð báturin skrásettur sum stuttleikabátur og fær navnið Don Q á Tvøroyri. Í 2017 var báturin upphøgdur á Skála.