Anna Falkenberg er bert onnur kvinnan, ið er vald á fólkating. Lisbeth L. Petersen - eisini úr Sambandsflokkinum - varð hin fyrsta, tá hon vann sessin á fólkatingsvalinum í 2001. 

Unga stjørnuskotið Anna Falkenberg tók øll á bóli, tá ið við heili 2.973 atkvøðurin gjørdist heilt stóri atkvøðuslúkurin hjá Sambandsflokkinum. Anna fekk útvið fýra ferðir so nógvar atkvøður sum nummar tvey á listanum, Johan Dahl. 

Eisini í øðrum flokkum gjørdu kvinnurnar góð hál. Bjørt Samuelsen gjørdist toppskjútti hjá Tjóðveldi frammanfyri Høgna Hoydal. Á triðja plássi kom Liljan Weihe, sum stillaði upp fyri fyrstu ferð. Liljan fekk heili 689 atkvøður, og bara fimm valevni yvirhøvur fingu fleiri atkvøður enn Liljan á fólkatingsvalinum.

Sjúrður Skaale fekk ikki óvæntað nógv flest persónligar atkvøður fyri Javnaðarflokkin, men áhugavert er, at Ingilín D. Strøm vann annaðplássið frammanfyri formannin, Aksel V. Johannesen. Barbara Apol kann eisini vera nøgd við eitt fjórðapláss á javnaðarlistanum.

Einasta kvinnuliga valevni hjá Fólkaflokkinum var Elsebeth Mercedis Gunnleygsdóttir. Elsebeth var toppskjútti í Klaksvík, men endaði sum nummar fýra samanlagt við knapt 600 atkvøðum - væl fleiri enn formaðurin -sum má metast at vera góðkent í einum annars út av lagi vánaligum úrsliti hjá Fólkaflokkinum.

Kanska flokkuriin eigur at umhugsa at stilla fleiri kvinnur upp til næstu ferð? Tað tykist í øllum førum sum um, at føroyski veljarin fegin vil hava fleiri kvinnur á politiska vígvøllin. 

(Bjarni Árting Rubeksen, KVF, eigur myndina)