KÍ kunngjørdi í gjár, at 42 ára gamli Magne Hoseth er settur sum høvuðsvenjari hjá felagnum komandi tvey árini. Hetta hendi skjótt greiðir venjarin frá, tí tað var hósdagin, at partarnir fingu samband fyrstu ferð. Av tí sama hevur hann ikki havt so nógva tíð at sett seg inní øll viðurskifti, men hann sigur, at tá hann byrjar í starvinum 1. januar, so hevur hann fingið eitt fult yvirlit yvir hópin og felagið. Hann sigur, at hann hevur sæð eini 6-8 dystir hesar síðstu dagarnar. Meir um tað seinni.

Uppá fyrispurning um ársins leikari hjá KÍ, Jóannes Bjartalíð, fer til Fredrikstad sum tað ljóðar, so sigur Magne, at tað hevur hann onga kunning fingið um, og tí er tað púra nýtt fyri sær, um hald er í tí.

- Um ein leikari hevur hug at fara avstað, so komi eg ongantíð at standa í vegin fyri tí. Eg vil hava leikarar, sum vilja spæla og avrika fyri KÍ. Eg byrji í starvinum 1. januar, so slíkar trupulleikastøður mugu vita taka upp, tá tær koma, sigur hann.

Í grein seinni koma vit inná, hvør ætlanin er við hópinum, hvar liðið skal styrkjast og hvussu venjaratoymið verður mannað.