Vit fara at taka munandi meira inn í tilfeingisgjøldum og tøkugjøldum, sigur Ruth Vang. Býtislykilin millum land og kommunur er ikki greiður enn, men at nýggja samgongan ætlar sær at leggja hægri gjøld á vinnulívið og lata ein part av tí út til kommunurnar. Greitt er heldur ikki, um talan verður um allar kommunur ella tær kommunur, ið leggja firðir til alivinnuna og har fiskivinnan hevur heima.

Løgmaður nevnir tó í aðrari samrøðu við Norðlýsið, at samgongan í hesum sambandi fer at hyggja eftir, hvussu nógv kommunurnar missa í partafelagsskatti, og tað kundi bent á, at tað fyrst og fremst verða kommunurnar, ið hava fiski- og alivinnu, ið fáa lut í tilfeingispeninginum, og at parturin hjá kommununum fer at standa í proportión við tað. Men ongin lykil er ásettur enn, sigur løgmaður eisini.