Hitalagið er farið niður ímóti frostmarkinum, so avfallið er ikki longur regn, men vátakavi ella kavi.

Í dag, fríggjadag, er landnyrðingur, vindferðin liggjur um 3 til 8 m/s. Allan dagin í dag er skýggjað og ælaveður við regni ella vátakava. Onkra løtu í støðum kanska kavi. Hitin í dag fer at liggja úr frostmarkinum upp í 5 stig.

Í morgin, leygardagin, er framvegis landnyrðingur, veksandi vindur úr 3 til 8 m/s um morgunin upp í 10 til 15 m/s seinnapartin. Um kvøldið er aftur minni vindur, 5 til 10 m/s, og ættin hækkar upp í  norðan. Allan dagin skýggjað og kavaæl, tó klárnar tað eitt sindur út á kvøldið. Um náttina smáskýggjað og ælaveður. Hitin í morgin fer at liggja úr 2 kuldastigum upp í 2 hitastig.

Sunnudagin er ættin norðan, vindur um morgunin 5 til 10 m/s, men veksur upp í 8 til 13 m/s út á fyrrapartin. Smáskýggjað allan dagin, fyrrapartin kavaæl, men seint fyrrapartin og restina av degnum fer tað at kava.

Gott vikuskifti.