Tjaldrið og várið hoyra saman
Veðrið má sær sjálvum ráða, og veðurvánirnar fyri komandi vikuna siga frá framhaldandi kava. Hóast várið er komið við vónum um lýggjari tíðir, so síggja vit, at kavin liggur tjúkkur yvir bø og ong.
Sunnudagin 12. mars er grækarismessa, sum hevur navn eftir Grækaris mikla páva, sum doyði 12. mars í 604.
Tað er vanligt, at skipað verður fyri grækarismessuhaldi ymsastaðni í landinum og soleiðis verður eisini í ár. Grækarismessudagur er almennur flaggdagur í Føroyum.
Tjaldrið boðar frá vári og á grækarismessu bjóða vit tjaldrinum vælkomið, hóast tjøldur síggjast við strendurnar, áðrenn tað.
Næmingarnir í 1.d og 2. d eru farnir í holt við at tekna tjøldur. Teimum dámar væl at tekna tjøldur og at dvølja við myndirnar. Sigast má, at væl liggur fyri. Myndirnar boða frá vári og ljósari tíðum.
Aðrir flokkar fara eisini at arbeiða við grækarismessu og tjaldrinum í komandi viku.
Við hesum myndum vilja vit bjóða tjaldrinum vælkomið og ynskja øllum ein góðan grækarismessudag.