Í kvøld verður toppdystur í Klaksvík.

Nr. 1 og 2 í Betri Deildini hjá monnum bresta saman í Klaksvík í kvøld. Undan dystinum eru seks stig á muni millum liðini, so stigatalvan kann fara at broytast nógv eftir kvøldsins úrsliti. KÍ kann sleppa níggju stig leyst av B36, men B36 kann eisini fáa samband við KÍ, tí ein sigur til B36 ger, at tað verða bara trý stig millum liðini.

Hjá KÍ fóru fleiri leikarar skaddir av vøllinum sunnudagin. Mest álvarsamt tykist tað verða hjá Jóannes K. Danielsen, sum ikki verður tøkur komandi dystirnar. Vegard Forren og René S. Joensen verða møguliga klárir og tað sama verður Patrick Da Silva, sum ikki hevur spælt síðstu dystirnar.

Hjá B36 hava nærum allir leikararnir verið tøkir síðstu tíðina og einki leikbann er til dystin.

Dysturin við Djúpumýrar byrjar kl. 19.00. Dómari verður Dagfinn Forná.