Klaksvíkingurin Malvinus í Gong stovnaði í 2015 norsku fyritøkuna Fluctus saman við norska starvsfelagnum Runar Hatlevik. Sambært almennum roknskaparupplýsingum umsetti felagið fyri meira enn 260 milliónir norskar krónur í 2022.

Sambært iLaks.no hevur fyritøkan nú gjørt stóran sølusáttmála á fyrsta ráðstevnudegnum á størstu norsku alimessuni AquaNor. 

- Vit gleða okkum til samstarvi við Minze Longyangxia, sum vit fata sum eitt sterkt og spennandi felag. Fluctus kemur við drúgvum royndum og góðum førleikum innan útgerð til aling yvirskipað og fóðringarskipanir ítøkiliga, sigur Harald Lien, dagligur leiðari í Fluctus í einum tíðindaskrivi.

Talan er um tríggjar luftbornar fóðurskipanir og ein vatnborin fóðurskipan. 

Malvinus í Gong telist framvegis millum størstu partaeigararnar í Fluctus. Sambært norskari heimasíðu eigur Malvinus ein sættapart av fyritøkuni. Við ársenda 2022 hevði fyritøkan eina bókaða eginogn á 19 milliónir krónur.