Í miðvikuni fer eitt hátrýst við góðum veðri at leggja seg yvir Føroyar, men tað ger skjótt av og má víkja fyri einum nýggjum lágtrýsti, sum fer eystureftir beint sunnanfyri.

Næstan allar ættir vera at merkja hesa vikuni.

Veðrið í vikuni – dag fyri dag:

Mánadag: Um náttina eitt lítið lot sunnan, minni enn 5 m/s, skiftandi skýloft og ælaveður. Um morgunin og fyrrapartin gongur hann upp í vestan, smáskýggjað og okkurt ælið. Seinnapartin hækkar hann upp í landnyrðing og um kvøldið upp í norðan og veksur vindin upp í frískt lot til frískan vind, 5 til 10 m/s, skiftandi skýloft og ælaveður. Hitin 8 til 11 stig.

Týsdag: Um náttina og fyrrapartin frískt lot til frískan vind norðan, 5 til 10 m/s, smáskýggjað og okkurt ælið, men út á fyrrapartin turrari. Seinnapartin minkandi vindur niður í lot til frískt lot, 3 til 8 m/s, meðan ættin gongur niður í landnyrðing. Um kvøldið lítið lot vestan, minni enn 5 m/s, smáskýggjað og yvirhøvur turt. Hitin 5 til 9 stig.   

Mikudag: Um náttin eitt lítið lot vestan, minni enn 5 m/s, sum út á morgunin og fyrrapartin lækkar niður í sunnan. Smáskýggjað og yvirhøvur turt. Seinnapartin lot til frískt lot sunnan, seinni av landsynningi, smáskýggjað og yvirhøvur turt. Hitin fer úr 5 stigum á morgni upp í 11 stig seint seinnapartin.

Hósdag: Frískt lot til frískan vind av landsynningi, 5 til 10 m/s, skiftandi skýloft og yvirhøvur turt. Seinnapartin og frameftir frískur vindur upp í ein strúk eystan og av landnyrðingi, 8 til 13 m/s, smáskýggjað og løtur við regni, serliga sunnanfyri. Hitin 6 til 10 stig.

Fríggjadag: Frískur vindur upp í ein strúk av landnyrðingi, 8 til 13 m/s, smáskýggjað og okkurt ælið. Út á dagin minni vindur. Hitin 5 til 10 stig.