Í kvøld verður toppdystur í Gundadali, ið kann fáa sera avgerandi týdning fyri meistarastríðið 2023.

Undan dystinum eru fimm stig á muni millum liðini, tó at KÍ hevur ein dyst færri. KÍ hevur eina óvanliga harða dystarskrá restina av kappingarárinum í Føroyum vegna altjóða dystir og útsettar landskappingardystir, so vinnur HB hendan dystin, so er meistarastríðið púra opið.

Hjá HB er ivamál um Teit M. Gestsson, sum ikki hevur spælt síðstu landskappingardystirnar, men sum var við landsliðnum báðar dystirnar. Hanus Sørensen gav avboð til landsliðið, meðan Samuel Chukwudi ikki var við U21-landsliðnum. Hjá KÍ væntast Heini Vatnsdal og Claes Kronberg ikki at spæla, meðan ivamál er um Vegard Forren, Hall Hansson og Páll A. Klettskarð.

Dysturin í Gundadali í kvøld byrjar kl. 18.00. Dómari verður Kári á Høvdanum.