Greinarar hjá bankum og børsmeklarum gera regluliga yvirlit yvir lønsemi í teim alifyritøkum, ið eru børsskrásettar. Børsskrásettar fyritøkur almannakunngera útgreinaði roknskapartøl hvønn ársfjórðing. Og í einum yvirliti frá norska stórbankanum DNB sæst, at Mowi Føroyar liggur á einum samlaðum triðja plássi av øllum teim greinaðu alifyritøkunum. Yvir 50 norskar krónur fyri hvørt kilo áðrenn rentur og skatt gav alivirksemi hjá Mowi Føroyum. Tað svarar til 33 føroyskar krónur/kg.

Føroyska alivirksemi hjá Bakkafrosti hevur annars javnan ligið heilt í topp, men hesaferð liggja tey nummar 7 á yvirlitinum fyri annan ársfjórðing 2023 við einum lønsemi á góðar 25 kr/kg í okkara pengum. Hinvegin liggur skotska alivirksemi hjá Bakkafrosti á einum 20. plássi.

Triðja føroyska alifyritøkan Hiddenfjord er ikki børsskrásett og almannakunnger heldur ikki roknskapir fyri hvønn ársfjórðing, tí ber ikki til at vita, um lønsemi teirra er betur ella verri enn hjá Mowi Føroyum. 

Í stuttari viðmerking til Norðlýsið sigur Hans Jakup Mikkelsen, stjóri á Mowi Føroyum, at hann er væl nøgdur við gongdina, og at Mowi hevur dugnalig fólk á øllum økjum.