Tórbjørn Jacobsen: Ongin havnarstongsul
Núverandi borgarstjórin og fyrrverandi havnarmeistarin í ávikavist Runavíkar Kommunu og Runavíkar Havn, Tórbjørn Jacobsen, heldur tað natúrligasta útfallið av brátt komandi fiskiveiðusamráðingunum við Russland vera, at havnarstongsulin fyri russiskum skipum verður tikin av frá 1. januar at rokna
Norðlýsið hevur tosað við Tórbjørn Jacobsen, borgarstjóra, og sambært honum er tað púra logiskt, at sáttmálin við Russland fyri 2024 fer at síggja út sum tann seinasti sáttmálin, ið varð undirskrivaður landanna millum.
- Tað ber ikki til at hava tveir fullkomuliga ymiskar logikkir í uttanríkispolitikkinum og tí vænti eg at sáttmálin verður óbroyttur, sigur Tórbjørn Jacobsen.
Tað merkir, at ongin broyting verður gjørd viðvíkjandi felagsøkinum hjá Føroyum og Bretlandi, samstundis sum stongsulin fyri øðrum russiskum skipum enn teimum, ið eru fevnd av fiskiveiðiavtaluni, verður tikin av. Havnarstongsulin var ikki partur av sáttmálanum fyri 2023, men varð innførdur 12. juli í ár.