Í nógv ár var tað Jóannes Bjartalíð, sum var mest skapandi leikarin hjá KÍ. Í 2021 legist Árni Frederiksberg afturat, so KÍ hevði tveir av slagnum. Síðsta vetur fór Jóannes Bjartalíð uttanlands og síðani hevur hesin parturin av spælinum ligið á vinstra fótinum hjá Árna Frederiksberg. Tað hevur serliga í altjóða fótbólti riggað væl. KÍ hevur í 12 altjóða dystum skorað 14 mál. Av teimum hevur Árni Frederiksberg antin skorað ella lagt upp til 12.

KÍ hevur ongantíð síðani 2015 spælt ein avgerandi dyst uttan báðar hesar skapandi leikararnar, og so má tíðin vísa, um KÍ fer at klára at skora og skapa málmøguleikar hóskvøldið. Árni Frederiksberg hevur leikbann hóskvøldið.