Í rásarúminum hesaferð vera Allan Mørkøre, sum júst er settur sum høvuðsungdómsvenjari á gentusíðuni hjá KÍ við ábyrgd fyri U11 til U16, og Oddur Olsen, sum er venjingarleiðari ella ”head of coaching” hjá U15- og U17-dreingjum hjá HB umframt at vera høvuðsvenjari hjá 1. deild monnum.

Fótbóltssendingin Skotið – fótbóltur í grannalagnum og úti í heimi verður send fyri fimtu ferð í kvøld kl. 19.30. Báðir hava teir slitið sínar skógvar í Djúpumýru og hava síðani valt at fara venjaraleiðina.

Jákup Ósá, ítróttarskrivari hjá Norðlýsinum skrivaði í næsta seinasta blaði at KÍ ikki stendur seg væl, at framleiða leikarar til besta liðið. Hetta verður vent. 

Sendingin fer í høvuðsheitum at snúgva seg um KÍ, HB, landsliðið og føroyskan ungdómsfótbólt.