Slutt við avtalum tvørtur um valskeið?
Formliga hava landsstýrisfólk og løgtingsfólk ikki skyldu til at halda avtalur, sum eru gjørdar í undanfarna valskeiði. Tí ber til at koma í støður sum hesa, sum Varpið í Klaksvík nú er komið í, at stjórnarskifti hevur verið, og nýggja stjórnin velur at steðga við seinasta partinum av játtanini, meðan arbeiðið stendur í hálvum gekki.
Norðlýsið hevur tosað við Bill Justinussen, fyrrverandi løgtingslim, og hann sigur, at ”viðvíkjandi Varpinum gjørdi meirilutin í Fíggjarnevndini eina avtalu um, at 17 mió skuldu játtast tey trý árini, sum samgongan (undanfarna) sat við róðrið.
Avtalan varð eisini upprunaliga skrivað í fíggjarnevndarálitið, men bleiv tikin úr aftur, sum vit kunnu minnast, av tí at ein játtan, sum fer upp um 10 mió. kr. skal játtast sum verklagslóg, um hon skal vera bindandi. Hetta ynsktu vit ikki, tí verklagslógir hava aðrar treytir við sær. Tí samdust vit um, at játta 17 mió. yvir tríggjar fíggjarlógir sum stuðul. Hetta varð eisini óformelt upplýst yvirfyri Varpinum.
Nú sita onnur við borðið, og tey avgera sjálvi, hvussu bundin tey eru av avtalum, sum farna Fíggjarnevnd gjørdi við samfelagið. Men tað er góður siður at víðariføra slíkar avtalur, tí tað eru jú borgarar og feløg, sum standa við skegginum í postkassanum í slíkum støðum.
Tað eru nógv dømir um, at politikkarar, sum taka við eftir øðrum, víðariføra avtalur, sum undanfarnir politikkarar hava gjørt, júst fyri at borgarar ikki verða settir í keðiligar støður. Tað, sum hetta kann hava við sær, er, at líknandi avtalur, sum hendan fíggjarnevndin ger og fer at gera, heldur ikki verða virdar, tá onnur taka við eftir tey, sum nú sita. Og so er ein øvut siðvenja sett á lunnar, sum hevur keðiligar fylgjur við sær fyri borgarar og feløg.”
At sitandi samgonga nú velur at siga, at avtalan um Varpið ikki hevur nakað at siga longur, tí hon varð gjørd, meðan undanfarna samgonga sat við valdið, kann lættliga vísa seg at koma teimum sjálvum aftur um brekku. Tí ein komandi samgonga kann velja at gera teimum kunstin eftir og siga, at heldur ikki tey kenna seg bundin av at gera nakað liðugt, sum sitandi CEF-samgonga hevur sett í gongd.
Hetta fer at verða sera óheppið fyri langtíðarpolitikkin, tí frá nú av fara fólk, feløg og borgarar ikki longur at kunna hava álit á, at játtanir, sum annars ganga yvir valskeið, ikki fara at verða steðgaðar, tá vaktarskifti er í Tinganesi.
Og fyri limirnar í CEF-samgonguni sjálvari merkir tað, at tey ikki eiga at seta nakað í gongd, sum ikki er útgoldið áðrenn 8. des. 2026, tá næsta løgtingsval í seinasta lagi verður. Tí við nýggju siðvenjuni eru komandi Løgting og komandi Landsstýri heldur ikki bundin av nakrari avtalu, sum núsitandi samgonga ger.