Í morgun er eitt lítið lot av útsynningi, miðalvindferðin kring landið er upp í 5 m/s. Í erva er skýggjað ella samdrigið, og í støðum mjørki. Okkurt ælið er. Hitin er komin upp í eini 10 stig. Hann fer nøkur stig upp afturat seinnapartin.   

Veðrið fer at broytast bert eitt sindur í dag, frá hesum sum er í morgun. Seinnapartin verður eitt lítið sindur meira vindur, 3 til 8 m/s – tað er ikki nógv broyting – og so fer at klárna nakað í erva. Um tað verður heilt klárt, er óvist, men kanska smáskýggjað og sólglottar. Og tað er so veðrið í dag og í nátt.  

Í morgin er hann aftur útsynningur, 3 til 8 m/s turt, hálv- ella smáskýggjað og okkurt ælið, til liðið er nakað væl út á seinnapartin. Tá veksur vindurin aftur eitt sindur, upp í 5 til 10 m/s, sum frá líður samdrigið okkurt ælið. Hitin sum í dag 8 til 13 stig.

Sunnumorgunin fer vindurin at veksa eitt sindur, upp í 8 til 13 m/s, meðan eitt brúgvalag við regni nærkast av útsynningi. Fram ímóti middegi er samregn um alt landið. Tað regnar nakrar tímar. Tað slítur í, tá ið nakað er liðið út á seinnapartin. Tá fer ættin fer úr útsynningi upp í vestan. Sunnukvøldið veksur vindurin upp í 10 til 15 m/s, tað er samdrigið og okkurt ælið. Hitin sunnudagin sum í dag og í morgin 8 til 13 stig.

Góða norðoyastevnu og gott vikuskifti.