Upptakt: KÍ-NSÍ
KÍ fær í dag vitjan av NSÍ í einum dysti, har trýst er á KÍ fyri at vinna.
Eftir landsliðssteðg byrjar Betri Deildin aftur og nú verður hildið fram út í eitt fram til á Norðoyastevnu. Í landsliðssteðginum hava nakrir KÍ-leikarar verið við landsliðum og serliga Pætur Petersen hevur gjørt um seg eftir, at hann skoraði tvey mál í fyrra landsdystinum.
Eftir tapið móti B36 seinast haltar KÍ longu aftanfyri hini bæði liðini, sum væntast at fara at kappast í toppstríðnum, og tí er stórt trýst á KÍ fyri at vinna dagsins dyst, sum er á heimavølli móti uppflytarunum NSÍ. NSÍ hevur trý stig fyri tvey umfør. Hóast uppflytarar so væntast NSÍ ikki at koma at kappast í botnstríðnum í ár, tí liðið hevur fingið so góða tilgongd undan kappingini. Júst KÍ og NSÍ hava gjøgnum tíðirnar spælt nógvar sera undirhaldandi dystir.
Hjá KÍ eru Heini Vatnsdal, Odmar Færø og Hallur Hansson framvegis ikki tøkir vegna skaðar. Jákup B. Andreasen verður neyvan tøkur til hendan dystin, og ivamál er um Jóhan Josephsen, sum fekk ein smáskaða í 1.deildardysti leygardagin. Hinvegin er møguleiki fyri, at Børge Petersen og Jonn Johannessen verða í hópinum. Hjá Jonn verður tað - um so er - fyrstu ferð síðani hann avgjørdi dystin móti B36 í fjør, at hann er við í dystarhópinum.
Dysturin við Djúpumýrar í dag byrjar kl. 15.00. Dómari verður Alex Troleis.