Ígjár skrivaðu vit at Ídni verður goymsla, tað gjørdu vit tí at meirlutar í bæði havna- og vinnunevndini og fíggjarnevndini í býráðnum hildu tað. 

Men so verður ikki. 

Tað uppstóð ein heldur óvanlig støða á býráðsfundinum ígjárkvøldi. Málið um hvat best er at gera við bygningin Ídni elvdi til knarr og frustratiónir í býráðsmeirilutanum.

Í juni mánaða varð samtykt at skriva út eina hugskotskapping um hvat Ídni skal brúkast til, men á býráðsfundinum ígjár vóru býráðslimir aftur bidnir um at taka støðu til hvat Ídni skal brúkast til. Umsitingin hevði soljóðandi tilmæli: Umsitingin í Klaksvíkar kommunu vil hava býráðslimir at taka støðu til um Ídni skal bjóðast út í samband við hugskotskoskapping  ella loyva Kl. Havn at brúka bygningin til goymslu/smiðju.

Borgarstjórin Karl Johansen mælti til at halda fast við samtyktina frá juni mánaða og at skriva út eina hugskotskapping. 

Herman Samuelsen, formaður í Teknisku Nevnd og partamaður hjá Karl Johansen borgarstjóra, var týðuliga frustreraður um at málið um Ídni aftur varð lagt fyri og ongin enda sást á málinum. 

Annika S. Biskopstø, varaborgarstjóri gav Jógvan Skorheim rætt í at tað kemur ov ofta fyri at mál ikki verða loyst nóg væl í umsitingini, eftir at politikararnir hava samtykt tey í býráðssalinum. 

Sylvia Thomsen, nevndarforkvinna í Havna- og Vinnunevndini helt eisini at mál taka ov langa tíð í umsitingini, hon tók í egnan barm og segði at hetta ikki eigur at henda meira framyvir. 

Minnilutin helt somuleiðis lítið um at málið aftur var á skrá og hildu at slíkt átti at verið avtala innanhýsis á einum samgongufundi. 

Eftir kjakið varð atkvøðugreiðsla og har tóku 8 býráðslimir undir við at skrivað verður út hugskotskapping, og tríggir vóru ímóti.