“Skipanin við inntøkutrygd (…), hevur síðani 1. januar 2011 verið umsitin og fíggjað av arbeiðsgevarunum og -takarunum í fiskivinnuni umvegis Trygdargrunn Fiskivinnunnar. Inntøkur grunsins stava í høvuðsheitum frá, at eigarar av fiskiførum, heimahoyrandi í Føroyum, ið hava loyvi til vinnuligan fiskiskap sambært lóg um sjófeingi, rinda eitt gjald fyri allar avreiðingar”, stendur at lesa í leiðslufrágreiðingini fyri Trygdargrunn Fiskivinnunnar fyri 2022.

Víðari stendur, at gjaldið síðani 1. januar 2017 hevur verið 0,6% av avreiðingarvirðinum, og at inntøkurnar til grunnin í 2022 vóru 23,7 milliónir, meðan útgjøldini hava verið 11 milliónir sama ár.

Tað stendur eisini tilskilað í løgtingslógini um Trygdargrunn Fiskivinnunnar, §7, stk. 1, hvaðani fæið í grunninum kemur.

Tí er tað misvísandi, at í Várfrágreiðingini hjá Búskaparráðnum er minstalønin til fiskimenn nevnd undir yvirskriftini “Avtak almennar stuðulsskipanir”.

Tí talan er um eina skipan, sum vinnan fíggjar sjálv.