Meðan riggað verður til Úti í Klaksvík, har serliga skótarnir skipa skrúðgonguna, er nógv hugnaprát millum tey mongu luttakandi.

Fremstir ganga skótar við fløggum, síðani hornorkestrið, síðani býráðslimir, so teir yngru skótarnir og so allur riðilin av ítróttarfólki.

Borgarstjórin, Karl H. Johansen, sum er barngóður og áhugaður í hvussu ungdómurin trívist og hvat, hann annars fæst við, fór at práta við teir smæstu skótarnar, ið gingu beint aftanfyri býráðslimirnar.

Jú, prátið gekk væl, og tey ungu høvdu nógv at fortelja, hesum áhugaða manninum. So spyr ein eldri: "Vita tit hvat hetta er fyri ein maður"?

Paul Watson! Var ein óviti skjótur at svara. Helst man hann hava sett borgarstjóran - ikki av órøttum - í sambandi við grind og grindadráp umvegis miðlarnar.

Nei, so var tað ein, sum visti betri beskeð - "Hatta er borgarstjórin! Hann bestemmar í Klaksvík"! Og so var látur og tíð var at fara til gongu við skrúðgonguni.