Familjubond eru til Eiðis og hetta merkir millum annað at seyður og fjallgonga eru á skránni hesa tíðina á árinum.  

Hagaparturin Breiðá er 4 merkur og 2 gyllin til víddar og talan eru um einar 15-20 eigarar. 

Í morgun møttu vit kl. 08.00 á rættini. Veðrið var nakað grátt, men tó ikki so at vit hugsaðu um at setast aftur. Áhugavert í mun til onnur ár var tá røktingarmenninir settu nýggju skiljiskipanina upp. Síðani varð koyrt niðan á Vombina tætt við Eiðisskarð og gingið varð niðan Vaðhorn. 

Skjótt gekk at fáa seyðin í rætt, rein undanbrekka, sum maðurin segði. Tveir hundar vóru við, tað ger stóran mun. Konur og børn vóru eisini við á rættini. 

Medisin givið og koppsett varð fyri brásótt. Skiljiskipanin royndist sera væl, har lombini vóru leidd ein veg og ærnar hin vegin. Síðani at royta og skjótt gekk. Tá seyðurin var royttur fingu ærnar medisin og tær vóru leiddar ígjøgnum skiljingina og tað gekk sera skjótt og smidliga. 

Vælnøgdu, nýroyttu seyðirnir og fjallfólki fóru hvør til sítt nakað út á seinnapartin.