Við at seta fokus á tey minni feløgini, so sum dart, billiard, bridge, hornorkestrið, skótaliðini, Magnus Heinason og Nólsoyar Pálls, Klaksvíkar Fimleikarfelag og bygdafeløg, kunnu vit styrkja felagsskapin og trivnaðin í kommununi.

Betri karmar til tey minni feløgini

Hesi smáu feløg eru ein týðandi partur av tí fjølbroytni, sum vit bjóða borgarunum. Við at skapa betri karmar – í formi av stuðli, hølum ella samskipan – kunnu hesi feløg geva limum eitt betri tilboð. Klaksvíkar kommuna kann hava ein týdningarmiklan leiklut við at stuðla hesi feløgum og tryggja varandi loysnir, sum økja um trivnað og møguleikar hjá øllum.

Marg-hús á Biskuptorgi – eitt felagshús fyri smáu feløgini

Ein møgulig loysn kundi verið at savna fleiri av smáu feløgunum í einum marg-húsi, til dømis á Biskuptorgi. Hetta hús kundi savnað feløg sum dart, bridge, hornorkestrið, og bygdafeløgini, ið kundu nýtt hølini og hentleikarnar til bæði at møtast og samstarva. Ein samansjóðing undir einum taki, hevði styrkt hesi feløg og virkað sum eitt samlingsstað fyri borgarar við áhuga fyri fjølbroyttum frítíðarvirksemi.

Biograf og nýggj mentanartiltøk í Varpinum

Mentanarlívið er eisini ein týdningarmikil partur av trivnaðinum. Ein biografur í Klaksvík hevði verið eitt mentanarligt lyft og hevði savnað borgarar um eitt nýtt tilboð. Mentanarhúsið Varpið kundi hýst einum biografi við ávísum filmum og verið karmur um ráðstevnur, sjónleikir, konsertir og kappingar. Hetta hevði styrkt mentanarlívið og gjørt Klaksvík til eitt livandi stað við fjølbroyttum upplivingum.

Við einari felags framtíð í huga

Við at leggja fokus á trivnað og skapa betri karmar fyri smáu feløgini er tað møguligt at styrkja lívsgóðskuna hjá øllum borgarum í Klaksvík. Við einum framhaldandi arbeiði og stuðli frá Klaksvíkar kommunu, kunnu vit skapa eitt stað, har fólk finna gleði og kensluna av at hoyra til í einum fjølbroyttum frítíðarvirksemi.

Álvur M. Zachariasen - Ein spíri úr sterkari rót.

Valevni fyri lista D til kommunuvalið 12. novembur í Klaksvík