Feskasta veljarakanningin gevur Fólkaflokkinum 9 tingfólk, Tjóðveldi 6 og Framsókn 2. Tað gevur 17, og harvið er meiriluti fyri eini fullveldissamgongu, skuldi valúrslitið gjørst tað sama.

Reyð/grøna rákið, sum hevur havt viðvind í nøkur ár, er í afturgongd kring stórar partar av heiminum, og tað sær eisini út til at henda her. Tjóðveldi var undir undanfarna formanninum eksponentur fyri tí reyð/grøna rákinum í miðstaðarøkinum, og tað ber ikki til at avnokta, at tað var upp á bekostning av gomlu kjarnuvirðum floksins, ið vóru at vera ein loysingarsinnaður fiskimannaflokkur. Bert elalítil og lutfalsliga týdningarleys fet eru tikin á fullveldiskós seinastu 20 árini, og fiskimaðurin hevur at kalla vent flokkinum bakið. Eisini hevur flokkurin mist nógv norðantil í landinum. Reyð/grøna kósin vann nakað inn aftur í Suðurstreymoy, skal tó sigast.

Her hevur nýggja forkvinnan verið sera greið. Hon vil aftur til gomlu virðini hjá flokkinum, har flokkurin skal vera pro-fiskimenn, pro-loysing, og so vil Sirið eisini savna útjaðara og miðstað. Sirið Stenberg kemur sjálv úr útjaðaranum, hon hevur úttalað seg greitt um at kunna góðtaka fiskiveiðiavtaluna við Russland – sum Tjóðveldisflokkurin sjálvur triði, umboðaður av Finnboga Ísakssyni sum varamanni fyri Petur Reinert undir formansskeiðnum hjá Erlendi Paturssyni, fekk í lag í 1977 – og hon hevur eisini lagt doyin á at seta fullveldismálið aftur á skinnarar. Forkvinnuvalið sjálvt og nú hendan veljarakanningin eru greið tekin um, at bæði inni í floksapparatinum og úti millum veljararnar er undirtøka fyri hennara politikki.

Javnaðarflokkurin er gamaní framvegis størstur av samgonguflokkunum, eisini í nýggjastu kanningini, men fer valúrslitið á komandi vali at líkjast hesi ella einari av nógvu undanfarnu kanningunum, so verður Javnaðarflokkurin orsøkin til, at hendan samgongan ikki kann halda fram. Hann kann gamaní royna at klinka eina heimastýrissamgongu við Sambandsflokkinum og øðrum av teimum smáu, men tann samgongan er minni sannlík enn ein fullveldissamgonga millum Fólkaflokkin og Tjóðveldi umframt Framsókn. Vit hava áður skrivað, at ein fullveldissamgonga millum teir báðar er ógjørlig, so leingi Jørgen Niclasen og Høgni Hoydal vóru formenn, og tað vísti seg sjálvsagt eisini at passa – men nú eru teir tað ikki longur.

Men skal Fólkaflokkurin taka Tjóðveldi fram um Sambandsflokkin, má Tjóðveldi helst eisini til at slaka nakað á reyð/grøna økinum og royna at fáa undirtøku frá vinnulívinum aftur. Tað fer uttan iva at kosta fleiri reyð/grønar og ”woke”-atkvøður í Havn, men tað fer heilt víst at geva atkvøður í vinnulívsøkjunum Eysturoynni og Norðoyggjum í staðin fyri. Og fyri fullveldismálið er tað avgjørt frægari at satsa upp á eitt sterkt vinnulív enn upp á at vera woke og reyðgrøn. Tað er havt á munni fleiri ferðir fyrr, og tað ger onki, um tað verður endurtikið, tí tað er satt: Uttan eitt sterkt vinnulív gerast Føroyar ongantíð fullveldi.

Í seinasta lagi um 2 ár skulu føroyingar aftur á val. Og vegurin til eina fullveldissamgongu liggur eftir nýggjastu veljarakanningini at døma opin. Javnaðarflokkurin er ein søkkandi skúta, og nógv bendir tí á, at vit fáa antin eina høgrasamgongu millum Fólkaflokkin og Sambandsflokkin, ella nevndu fullveldissamgonguna eftir komandi val.