Jógvan Hansen, Jógvan í Skálum, í Vestmanna smíðaði átta sera snøggar motorbátar saman við monnum sínum, áðrenn hann tók við sum bedingsmeistari á Tórshavnar skipasmiðju (nú MEST). Tordenskjold, ið var sætti í røðini, varð smíðaður til Hans Paula Joensen í Haldórsvík.

Í 1941 keypti Kjølbro bátin frá Hans Paula og gav honum navnið Grunningur. Hann róði út, til Sjúkrahúsverkið í 1953 keypti bátin, læt hann umbyggja til læknabát og nevndi hann Medicus P 53. Hann fekk m.a. ruff við stórari lúku til børu framman fyri stýrihúsið. Eftir umbygging varð deksbáturin máldur til 19 tons.

Medicus røkti sjúkraflutning í Norðuroyggjum til 1975, tá ið nýggi Medicus, ið Reinhold Jacobsen og menn hansara smíðaðu á Stongunum í Klaksvík, fór at sigla. Gamli Medicus varð seldur til Havnar, men er ikki til longur.

Skoytast skal uppí, at Jógvan í Skálum og menn hansara eisini smíðaðu postbátin, Ólav, 14 tons. Hetta var í 1930. Vestmenningar hava fingið gamla postbátin sleipaðan til Nólsoyar, har ið hann skal setast í upprunastand.