Útlutar samgongan sær sjálvari fiskirættindi?
Í apríl í fjør tók Dennis Holm av sínum eintingum 35.000 tons av svartkjafti frá aktørunum, sum annars skuldu fiskað tey tonsini, og útlutaði øðrum. Dennis Holm varð eftirfylgjandi kærdur fyri Landstýrismálanevndina fyri hetta, og tá vísti Norðlýsið á, at ein teirra, sum stóð til at vinna av teirri útlutingini, var samgongufelagin hjá landsstýrismanninum sjálvum, tingmaðurin Kim Durhuus.
Kim Durhuus eigur nevniliga meirilutan í einum felagi (Sp/f 14.05.), sum eigur 30% av uppsjóvarskipinum Biritu. Í kvøld var so innslag í útvarpstíðindunum í Kringvarpinum um, at sami løgtingsmaður kann vinna enn meira við nýggju broytingini hjá sama Dennisi Holm. Tingmaðurin skal sostatt atkvøða um broytingar í sjófeingislógini, sum kunnu geva felagnum, sum hann sjálvur eigur í, betri sømdir.
Við Kringvarpið segði Kim Durhuus einans, at hetta simpulthen eru spælireglurnar, og legði afturat, at hann væntaði, at uppskotið fór at verða samtykt. Hann nevndi ikki nakran møguleika fyri at víkja sætið og kalla varafólk inn vegna ógegni. Varafólkið hevði í so fall verið Birita Matras Petersen úr Klaksvík.
Ognarviðurskifti - Sp/f Gráisteinur. Mynd: Fiskimálaráðið
Les eisini: https://kvf.fo/greinar/2025/01/22/logtingsmadur-hetta-eru-spaelireglurnar