Veðrið um vikuskiftið
Veðrið hetta vikuskiftið fer at vera merkt av illveðrinum, sum hevur verið í Írlandi og Skotlandi í dag. Ikki tí tað fer at verða ordiligt illveður her í Føroyum – men bara eitt sindur keðiligt – men lágtrýstið Éowyn fer framvið eystanfyri her hjá okkum, og ættin er tí farin úr landsynningi upp í eystan og so landnyrðing – og í nátt norðan.
Í morgin gongur hann vesturum til útnyrðing og so vestan. Har steðgar hann ein løtu.
Taka vit veðrið meira detaljerað, so er í løtuni strúkur í vindi ella skrið eystan, 13 til 18 m/s, í kvøld gongur hann upp í landnyrðing, loftið samdrigið og sum frá líður er samregn. Seint í kvøld og í nátt minkar vindurin niður í frískt lot upp í strúk av norði, 7 til 12 m/s. Fyrrapartin í morgin fer hann at liggja um vestan, men framvegis samdrigið og regn ella ælaveður. Hitin 3 til 7 stig.
Í morgin er rískur vindur upp í strúk av útnyrðingi, 8 til 13 m/s, men út á dagin veksur upp í hvassan vind ella skrið vestan, 15 til 20 m/s, samdrigið við regni ella ælaveðri, í støðum kanska vátakavi. Sum líður á kvøldið og um náttina minkar vindurin niður í frískan vind ella hvassan vind vestan, 10 til 15 m/s. Skýloftið skiftandi við vátakava- ella kavaælaveðri. Hitin 3 til 6 stig.
Sunnunáttina er frískt lot til frískan vind vestan, 5 til 10 m/s, men minkar út á fyrrapartin. Um kvøldið er lítið lot av ymsum ættum, minni enn 5 m/s, sólglottar og okkurt kavaælið. Mánanáttin veksur vindurin upp í frískt lot til frískan vind eystan, 5 til 10 m/s, hálv-ella smáskýggjað og yvirhøvur turt, men sum frá líður skýggjað. Hitin 1 til 5 stig.
Gott vikuskifti.