Tað hevur ljóðað í eina tíð, og nú er tað undirskrivað. Liðleiðarin hjá KÍ síðstu árini, Sylvan Jakobsen, sum er sera høgt í metum í KÍ, skiftir til norska stórfelagið Molde, har hann hevur gjørt ein tvey-ára sáttmála sum ’’kitman’’, sum svarar til líknandi leiklut, sum hann m.a. hevur havt í KÍ. Molde hevur nýliga skift venjara. Fyrrverandi venjarin hjá Hacken, Per Mathias-Høgmo, er nýggjur venjari og fleiri broytingar hava eisini verið í toyminum rundanum. Fyrrverandi hjálparvenjarin hjá KÍ, Daniel Berg Hestad, er venjari hjá eykaliðnum hjá Molde, og tað er gjøgnum hann, at Sylvan er endaður í Molde. Tað váttar hann fyri Norðlýsinum. Báðir persónarnir sum hava verið ’’kitman’’, sum Molde kallar tað á síni heimasíðu, góvust í vetur.

- Daniel Berg Hestad ringdi og spurdi, um eg var áhugaður at koma til Molde. Soleiðis kom tað í lag, sigur Sylvan Jakobsen í stuttari viðmerking úr Molde, har hann hevur verið síðstu dagarnar.

Molde var seinast meistari í 2022 og hevur javnan verið í bólkaspølum og deildarspølum í altjóða fótbólti síðstu árini. Molde hevði eitt skuffandi kappingarár í 2024, har liðið ikki spældi seg í Evropa, og tí fekk venjarin sekkin. Men Molde er enn við í Conference League í hesum kappingarárinum og skal 12. og 19. februar spæla play-off dystir móti írsku meistarunum Shamrock Rovers, so tað liggja stórar uppgávur fyri framman um stutta tíð.

Norski ríkmaðurin Kjell Inge Røkke eigur Molde.