Faroese Music Awards er tiltak, har bestu avrikini innan føroyskan tónleik verða heiðrað, og virðislønir verða latnar. Har verða beinleiðis tónleikaframførslur og verður stóra tónleika- og heiðurstiltakið sent beinleiðis í sjónvarpinum hjá Kringvarpinum.

Hetta er á triðja sinni, at Tónleikasamband Føroya samskipar FMA saman við Kringvarp Føroya – og nú eisini saman við Varpinum.

Tónleikasamband Føroya ætlar at gera teirra besta fyri, at tiltakið kann umboða alt tað  føroyska tónleikaumhvørvið á besta hátt, verður sagt.

Tá ið vit vóru inni á gólvinum í Varpinum í dag, runnu eini 30 fólk – tøkni-, ljóð- og ljósfólk hvør um annan, tó við skili í, tí allar leiðingar vóru komnar uppá pláss. Myndatól og skermar riggaðu, sum tey skulu, men tó er nakað eftir enn.

Uttanfyri stóð stóri tøknibilurin hjá Kringvarpinum og eitt bunti av leiðingum runnu frá honum og inn í Varpið, sum skulu bera bestu mynda- og ljóðgóðsku aftur til hyggjaran.

Hesuferð verður FMA heilt serligt. Tað er á fyrstu sinni, at FMA er farið út um Havnina og til Klaksvíkar - til stásligastu og nýggjastu karmarnar í Varpið.

Her kunnu  árligu virðislønarhandanirnar og mongu, serstøku tónleikaframførslurnar síggjast og upplivast, fríggjakvøldið tann 21. mars í 2025.

Vit gleða okkum at síggja teg á FMA!

Dato:

21. mars

Staður:

Varpið

Klokkan:

20:00 - 23:00

ÚTSELT!