Sum Norðlýsið skrivaði í gjár, er Bjarni Hammer úr Javnaðarflokkinum ikki álvuligur við nýggja uppskotið til sjófeingislóg, og hann fer ikki at taka undir við tí óbroytt. Og í dag, undir tí sum annars skuldi vera viðgerð av elveitingarlógini, var Sólvit Nolsøe úti við koyrlinum. Hann helt tað vera nógv fyri, at m.a. forkvinna hansara varð kallað inkompetent á almennum palli, og at sagt hevur verið um Dennis Holm, at hann hevur svikið sítt egna øki við sjófeingislógini.

Eisini kritiseraði Sólvit, at tingfólk – hann nevndi ikki nøvn, men meinar uttan iva við Bjarna Hammer – fóru upp á røðarapallin at boða frá, at um orðingar í sjófeingislógini ikki vórðu broyttar, so tók viðkomandi tingmaður ikki undir við broytingaruppskotinum í heila tikið. Sólvit føldi seg drignan upp á tráð, og vildi koma við einum kravboðum, tí tey vístu seg at rigga:

– ”Tí fari eg helst; nú fáa vit at síggja hvat Fíggjarnevndin kemur til við Suðuroyartunlinum, men hvissi í alternativa leiðin til Suðuroyartunnilin ikki verður ordiliga viðgjørd, ordiliga viðgjørd, so seti eg fram eitt broytingaruppskot”.

Hetta fekk tingmannin Jaspur Langgaard at ivast í, um Sólvit ikki tók undir við Suðuroyartunlinum. Sólvit Nolsøe fór tó uppaftur á røðarapallin eftir tað og segði, at hann var fyri Suðuroyartunlinum, men at linjuføringin skuldi lýsast nógv nærri.