Tilgongdin er nú komin á mál, og hevur nevndin gjørt avtalu við Niels Brynnum um at gerast nýggjur stjóri fyri samtakið.

Niels Brynnum er 53 ár og er ættaður úr Danmark, har hann eisini er búsitandi.

Niels Brynnum hevur drúgvar leiðsluroyndir frá fleiri viðurkendum feløgum, og hevur starvast nógv innan veitaravinnuna til alivinnuna í fleiri ymsum londum.

“Vit eru fegin um at hava funnið ein dugnaligan og royndan leiðara til at leiða samtakið frameftir. GroAqua strembar eftir at verða fremsti veitari av burðardyggum loysnum til alivinnuna, og skal nýggi stjórin tryggja at tann kósin heldur fram”, sigur Janus Thomsen, nevndarformaður í GroAqua.

Nýggi stjórin byrjar í starvinum 1. mai.

GroAqua, ið hevur høvuðssæti á Kambsdali, hevur feløg í Skotlandi, Norra og Pólandi, og selur sínar loysnir og tænastur til alifeløg í øllum norður Atlantshavi.

Bygnaðurin í samtakinum, ið telur yvir 100 starvsfólk, er skipaður við stjórum fyri hvørt land sær, umframt einum stjóra fyri samtakið.

Áður hevur samtaksstjórin eisini verið stjóri í Føroyum. Hetta verður nú broytt, og tí verður farið undir eina tilgongd at seta stjóra fyri GroAqua Føroyar.