Útmeldingin kom sama dag sum at frákoyrdi tíðindaleiðarin í Kringvarpinum, búsitandi í Havn, eisini kom við eini útmelding á Facebook um at steðga á við tunlinum.

Tað nýggja í hesum er sum so ikki mótstøðan úr miðstaðarøkinum um útbyggingar av samferðslukervinum. Hon hevur altíð verið har. Í mars 1992 savnaðu fólk í Hoydølum inn undirskriftir ímóti at gera Vágatunnilin. Í 2008 savnaði ein privatpersónur í Havn, sum seinni stillaði upp fyri Sjálvstýri, inn undirskriftir ímóti Sandoyartunlinum. Í báðum førum blivu íløgurnar skotnar umleið 10 ár fram í tíðina, uttan iva partvís vegna illviljan úr miðstaðarøkinum.

Tað nýggja er, at almennir stovnar í Havn nú at síggja til eru gingnir saman um at forða verkætlanum í útjaðaranum, meðan politiska viðgerðin enn er í gongd.

Vit hava áður sæð kolandi dýrar almennar byggiverkætlanir í Havn. Men ongin Landsbanki mælti frá Marknagilsdeplinum í 2008 ella H-bygninginum í Havn, og onki Kringvarp gjørdi ”dokumentarar” um, at hetta høvdu vit ikki ráð til. Ikki fyrrenn langt aftaná, at tær fyri Føroya fólk kolandi dýru verkætlanirnar í Havn gjørdust veritablar byggigølur, fingu vit dokumentarnar frá Kringvarpinum um óskilið. Og tá var tað alt ov seint at steðga teimum. Hvar vóru frámælini, áðrenn verkætlanirnar fóru í gongd?

Landsbankin hevur heldur ikki mælt frá ætlanini um at gera eitt Kampus í Havn, sum sambært summum keldum fer at kosta okkum skattgjaldarum eina milliard. Tíansheldur er higartil ongin dokumentarur komin frá Kringvarpinum um ovurhonds stóra kostnaðin, sum hetta fer at kosta Føroya fólki. Hvar eru frámælini og dokumentarurin?

Vit hava heldur ongan dokumentar frá KvF ella nakað frámæli frá Landsbankanum sæð um Tjóðleikhúsið, og um vit hava ráð til at gera ein so dýran stovn aftur í Havn. Metingin higartil sigur 600 milliónir, harav landið skal gjalda ein triðing. Hvar eru frámælini og dokumentarurin?

Kringvarpið hevur eisini áður funnist at gávum til vinnulívið í Klaksvík og Eysturoy, tí tey hava givið einum sjúkrahúsi í útjaðaranum eina gávu – í sendingum, har verturin var tann sami sum fyriskiparin av dokumentarinum í kvøld. Men ongar sendingar við illa fjaldum ákærum um oligarki vórðu gjørdar um tað, tá vinnulívið í Havn gav sjúkrahúsinum í Havn sama slag gávur í 1998 og 2013.

Samlaða myndin er ófrættakend. Vit hava almennar stovnar í Havn, sum mæla frá ábøtum og útbyggingum í útjaðaranum, men sum ongar innvendingar hava ímóti dýrum verkætlanum í Havn – ikki fyrrenn langt aftaná, at tær eru farnar í gongd, og tað er ov seint at steðga teimum. 

Vit hava eisini fingið at vita, at prísurin fyri Suðuroyartunnilin, sum Framsókn hevur kravt, at pensjónsaldurin hækkar upp í heili 70 ár. Tað er eitt stórt offur, vit borgarar lata, men verður Suðuroyartunnilin steðgaður, so hava vit føroyingar eitt fólkakrav um, at pensjónsaldurin heldur ikki hækkar.

Vónandi verður tann vinkulin eisini við í dokumentarinum í kvøld.