Stór útskifting hevur verið á U21-landsliðnum, har teir flestu blivu ov gamlir, sum spældu síðstu undankapping.

Harafturat er nýggjur venjari, sum er Ólavur Mikkelsen, sum hevur royndir sum m.a. hjálparvenjari hjá Víkingi og frammanundan tí venjari hjá næstbesta liðnum hjá Víkingi.

Hóast útskiftingin hevur verið stór, so eru nakrir leikarar við, sum av álvara hava gjørt um seg hetta kappingarárið. Stóra stjørnan er Áki Samuelsen úr Ranheim, sum hevur verið millum bestu leikararnar í Obos-deildini sambært hagtølum. Hann hevði helst verið í A-landsliðshópinum, um hann ikki hevði U21-aldur. Ein annar er Heini Sørensen úr HB, sum hevur verið millum teir mest eyðsýndu á HB-liðnum í ár. Og so eru nógvir klaksvíkingar, tó at teir flestu spæla við øðrum feløgum. KÍ hevur ein leikara við og tað er Dávid B. Andreasen, sum hevur fingið gjøgnumbrot í ár og sum helst fær ein leiklut, hóast hann ikki hevur spælt U21-landsdyst áður.

Fyrsti dystur er á heimavølli móti Estlandi og hetta er helst ein av dystunum í annars sterka bólkinum, har størst møguleiki er at fáa stig. 

Dysturin í Klaksvík byrjar kl. 18.00.