KÍ vann FM, løgmanssteypið og kom tvær ferðir víðari í altjóða fótbólti. 73 stig í 27 landskappingardystum og einki tap, fýra sigrar í fimm steypadystum og bara eitt tap í seks altjóða dystum, har KÍ kom víðari tvær ferðir móti liðum frá Finnlandi og Serbia.

Hyggur ein bara eftir úrslitum, so er hetta eitt av bestu úrslitum eitt kappingarár, sum nakað lið nakrantíð hevur havt í Føroyum. Lið hava vunnið greipur fyrr, men eingin hevur megnað at komið víðari í altjóða fótbólti sama ár sum greipan er vunnin.

Eitt ár er tó kanska hægri í metum. Tað er kappingarárið 2023 hjá KÍ. Tá vann KÍ FM og kom víðari til bólkaspælið í Conference League eftir at hava sent meistararnar úr Ungarn og Svøríki út úr Champions League umframt at KÍ fekk javnleik móti Lille og vann á Ljubljana í bólkaspælinum.

2025-liðið hjá KÍ hevur tí helst havt tað næstbesta árið, sum nakað føroyskt lið nakrantíð hevur havt.