Biðja norsku stjórnina um at endurskoða bannið
Russiska reiðaríið Murman Seafood heitir á norsku stjórnina um at taka bannið móti fyritøkuni upp til nýggja viðgerð. Ein av orsøkunum er, at bannið er í stríð við norsku fiskiveiðuavtaluna við Russland frá 1975, og ein onnur er, at síðani bannið eru nýggir upplýsingar komnir fram í málinum, sum benda á, at fyritøkan er ósek í ákærunum ímóti sær.
Av øðrum orsøkum verður nevnt, at avgerðin um at banna atgongd til norskar havnir og sjóøki varð tikin í skundi og helst av misgáum, sigur Murman Seafood, og víst verður á greiningar hjá m.a. trygdarserfrøðinginum Ole K. Fostad, sum áður hevur verið endurgivin her í Norðlýsinum. Hendan kanningin hevur varpað nýtt ljós á málið, men enn standa sanktiónirnar við, og tað undrar Murman Seafood.
Skrivið er orðað til norska uttanríkisráðharran Espen Barth Eide, og har vísir fyritøkan eisini á, at hon er komin við omanfyri 5 milliardum NOK, svarandi til 3,2 milliardir danskar krónur, til norska búskapin. Víðari verður sagt, at – júst sum ST eisini hevur boðað frá – at ES somuleiðis hevur staðfest, at matvørur ikki mugu verða umfataðar av sanktiónunum, og tað, at Murman Seafood nú er umfatað, var fyrstu ferð at sanktiónirnar raktu eina matvørufyritøku.
Alt skrivið frá Murman Seafood til norsku stjórnina kann lesast her:
Letter to the Minister of Foreign Affairs of Norway.pdf