Fyrsti fótbóltsdysturin, har leikararnir høvdu nummar á rygginum, varð spældur millum Sheffield Wednesday og Arsenal, tann 25. august 1928. FIFA tók siðin til sín og skipaði tað í fastar karmar til heimsmeistaraheitið í 1954.

Og tað var ikki fyrr enn til kappingina í 1958 í Svøríki, at nummar 10 gjørdist eitt "halgital". Hetta var alt orsakað av einum 17 ára gomlum drongi, sum luttók fyri fyrstu ferð og einum skrivstovu feili av tí brasilska fótbóltssambandinum.

Áðrenn kappingin byrjaði, høvdu teir brasilsku fótbóltsmyndugleikarnir latið ein lista inn av teimum úrvaldu leikarunum júst, sum teir skuldu, men høvdu gloymt at talmerkja teir. FIFA-umboðsmaðurin úr Uruguay, Lorenzo Villizzio, talmerkti tilvildarliga leikararnar. Fyrstimálmaðurin Gilmar fekk nummar 3, og tann tá rættiliga ókendi Pelé fekk nummar 10. Pelé, sum hevði verið skaddur, kom ikki á vøllin fyrr enn í triðja dystinum ímóti USSR, men skoraði samanlagt seks mál í fýra dystum - av hesum trý mál í 5-2 sigrinum á Fraklandi í hálvfinaluni og tvey mál í finaluni ímóti Svøríki. Soleiðis var tað, at legendan um nummar 10 byrjaði. Av berari tilvild.