Sirið Stenberg landsstýriskvinna hevur lagt uppskot fyri tingið, ið skal geva henni heimild at sanktionera tvey russisk reiðarí. Uppskotið varð samtykt við 2. viðgerð og fer tí helst ígjøgnum eisini við 3. viðgerð.

Í leiðara 20. november spurdu vit um Eysturoyar- og Norðoya Tjóðveldisfelag vóru avtikin, nú tey vóru so kyrr í málinum - ásannandi stóra leiklutin fiskivinnan hevur í landnyrðings-Føroyum.

Norðoya Tjóðveldisfelag meldaði greitt út hvat teirra hugsan var í tíðindaskrivi 22. november, m.a søgdu tey:

"Fiskivinnusamstarvið við Russland spælir ein týðandi leiklut í tí føroyska búðskapinum, og harvið eisini tí vælferð vit enn hava í Føroyum – serliga norðanfyri Hórisgøtu. At seta alt hetta í vanda, fyri at senda eitt súmbolpolitiskt signal til útheimin, vilja vit í Norðoya Tjóðveldisfelag staðiliga mótmæla, og er hetta ikki ein avgerð, sum vit vilja kenna okkum aftur í".

Vit spurdu tí Sirið Stenberg, forkvinnu í Tjóðveldisflokkinum um hennara viðmerking til útmeldingina hjá Norðoya Tjóðveldisfelag.:

"Eg haldi føroyski politikkurin at hava fiskiveiðiavtalu og at fylgja sanktiónunum hevur víst seg at halda.

Í síðsta enda er tað landsstýrismaðurin í fiskivinnumálum, sum eftir ráðførslu við løgtingsins uttanlandsnevnd, sum tekur endaligu avgerðina.

Sum skilst eru fyrireikingar til samráðingar í gongd.

Av tí at tað hevur tikið longri enn vanligt áðrenn Norra er farið til samráðingar koma okkara samráðingar nokk at liggja við ársenda.

So ongin ósemja er við felagið".