Venjaratoymið hjá 2. deild sett
Kristoffur Jakobsen og Asbjørn Tunga skulu leiða næstbesta liðið hjá KÍ upp aftur í 1. deild komandi kappingarár. Í felag hava teir drúgvar royndir, ið geva liðnum sterkt grundarlag.
Kristoffur hevur leikt ikki færri enn 328 dystir í bestu deildini í Føroyum, og harafturat hevur hann leikt góðar 200 dystir í 1. feild. Hetta er fyrstuferð at hann roynir seg sum høvuðsvenjari í vaksnu deildunum.
Asbjørn Tunga, hevur drúgvar royndir frá venjarabonkinum. Seinastu tvey kappingarárini hevur hann verið hjálparvenjara hjá besta liðnum hjá NSÍ. Hann hevur eisini verið venjari hjá 1. deild í Klaksvík, tá ið hann, sum høvuðsvenjari, førdi liðið til meistarar.
- Vit hava fingið eitt sera sterkt venjaratoymi til 2. deild. Asbjørn og Kristoffur hava neyðugu royndirnar og í felag eri eg ikki í iva um, at teir fara at gera eitt gott arbeið fyri at styrkja um 2. deild hjá KÍ, sigur Arnbjørn Danielsen, høvuðsungdómsvenjari hjá KÍ.