Eg ivist ikki í, at Kál og Josias hava hildið tað verið nóg strævið at stýra kommununi hesi árini, tí í hesum valskeiðnum byrjaði læknastríðið í Klaksvík. Men tað hevur helst verið lítið aftur ímóti í 1955, tá Richard Jacobsen, kendur reiðari og skipari, og sum var yngri beiggi Kál, tók við starvinum sum formaður í kommunustýrinum. Richard var bara formaður hetta eina árið, tá læknastríðið var í hæddini, men hann var sitandi í kommunustýrinum restina av valskeiðnum 1955-1958. Tá gavst hann í kommunalpolitikki. Frá 1956 til og við 1958 røkti Pól Jakku á Dalinum starvið sum formaður í kommunustýrinum. 1950 árini vóru eisini tung fíggjarliga hjá føroyingum.

Í bók síni “Mín lívssøga til sjós”, sum Richard gav út í 1984, greiðir hann frá fleiri tilburðum undir læknastríðnum, men her skal eg bara tríva í tann eina. Tann 27. apríl í 1955 kom danski ráðharrin Viggo Kampmann til Føroya. Richard fekk boð frá landsstýrinum at taka ímóti honum, tá hann kom norður til Klaksvíkar við “Thorshavn”. Vágin í Klaksvík var tá avbyrgd við weirum, so Richard fór út á Poll við motorbáti at taka ímóti honum. Teir fóru í land á Kósini og sótu alla náttina í stovuni hjá Richard og tingaðust, men har kom onki úrslit burtur úr. Kampmann fór síðan aftur til Havnar við “Thorshavn”.

Tann 8. november í 1954 var løgtingsval, og tá var Richard eisini valdur inn á ting. Richard skrivar, at læknastríðið harðnaði sum frá leið, og tí var hetta ein hørð tíð hjá sær bæði sum tinglimur og sum formaður í kommunustýrinum. Hann skrivar eisini, at um hetta mundið vóru blaðmenn úr øllum Norðurlondum komnir til Klaksvíkar, og av tí at hann var formaður í kommunustýrinum, var tað strævið hjá sær at svara spurningunum frá øllum hesum tíðindafólkunum.

Óla Jákup Dragaberg lænti mær myndina.