Veðrið um vikuskiftið
Veðrið um vikuskiftið fer at vera myndað av einum lágtrýsti, sum er millum Ísland og Grønland. Í kvadrantinum sunnan- og eystanfyri miðjuna er ættin millum sunna og útsynning, og tað fer hon at vera um vikuskiftið, unandtikið eina løtu sunnunáttina.
Luftin, sum kemur hendanvegin er lýggj, so einki kavaavfall hetta vikuskifið.
Í skrivandi stund (beint eftir middag) er upp í hvassan vind sunnaneftir, 10 til 15 m/s. Loftið er skýggjað og í støðum driv ella okkurt ælið. Út á seinnapartin og í kvøld veksur hann vindin upp í skrið, 15 til 20 m/s, samdrigið og út á kvøldið regn vestaneftir. Hitin í dag 4 til 9 stig.
Í morgin er frískur vindur upp í strúk av útsynningi, 8 til 13 m/s, samdrigið og regn ella ælaveður. Út á kvøldið minkar hann vindin niður í lot til frískt lot, 3 til 8 m/s, og út á náttina bert lot av ymsum ættum, minni enn 5 m/s. Eitt skifti turt og hálvskýggjað, men sum frá líður er aftur samdrigið og regn. Hitin 4 til 9 stig.
Sunnudagin frískt lot eystan, 3 til 8 m/s, seinni gongur hann niður í sunnan og veksur upp í 8 til 13 m/s. Samdrigið og samregn, men út á kvøldið bert okkurt ælið í støðum. Hitin 4 til 8 stig, um náttina í hæddunum niður ímóti frostmarkinum.
Gott vikuskifti.