Sum myndin vísir, verður parkeringsøkið staðsett millum Hotell KG og Føroya Bjór. Her hevur kommunan, í samstarvi við eigaran av nýggja hotellinum, gjørt avtalu um at seta í verk eitt alment parkeringspláss við plássi fyri umleið 30 til 35 bilum. Hetta er eitt týðandi stig í arbeiðinum at betra um parkeringsmøguleikarnar í miðbýnum, bæði fyri íbúgvar, hotellgestir og vinnulív.

Á býráðsfundi hin 9. apríl samtykti Klaksvíkar býráð at geva fyrisitingini heimild at fara undir samráðingar við Føroya Bjór um at geva fyritøkuni ræðisrætt til part av økinum, uml. 900 fermetrar, til nýtslu í sambandi við virksemið hjá fyritøkuni.

Fundir hava verið millum kommununa og Føroya Bjór, og tað, sum er eftir at fáa upp á pláss, er spurningurin um, hvussu leingi Føroya Bjór skal hava rætt til at nýta hetta lendið.

Við nýggja parkeringsøkinum verður eitt stig tikið móti einum meira atkomuligum og livandi miðbýi, har pláss verður fyri bæði býarlívi, ferðslu og einum livandi vinnulívi.