Neistin bleiv sendur suðuraftur til Havnar við ongum, tá tær í dag vitjaðu Stjørnuna
Sum væntað, so gjørdist dysturin millum kvinnurnar hjá Stjørnuni og Neistanum javnur og spennandi. Stjørnan fekk eina góða byrjan og kom á odda 4-1, men so kom stígur í hjá teimum. Næstu løtuna skoraði Neistin seks ferðir, meðan Stjørnan onki mál fekk. Stjørnan megnaði tó at svara aftur, og tá uml 20 minuttir vóru leiktir, stóð á jøvnum 8-8. Liðini skiftust um at skora tað sum eftir var av fyrra hálvleiki. Hálvleiksstøðan varð 12-11 til Stjørnuna.
Neistin kom betur frá byrjan í seinna hálvleiki og fekk eina leiðslu uppá 14-12, men stjørnuleikarnir góðu ikki upp, serliga var tað verjuparturin sum stóð væl, og fleiri ferðir bleiv dómt drál móti Neistanum. Tá seinni hálvleikur var hálvrunnin stóð á jøvnum 15-15. Eftir hetta tók Stjørnan leiðsluna, og sum seinni hálvleikur leið, øktist munurin støðugt. Tá fimm minuttir vóru eftir at leika, var støðan 22-17 til Stjørnuna. Seinastu løtuna fekk Neistin minkað um munin, soleiðis at endaliga úrslitið gjørdist ein uppiborin sigur til heimaliðið uppá 23-20.
Málini hjá Stjørnuni skutu: Judith Dam Jacobsen 5, Jancy Jacobsen 4, Jórun B. Nielsen 4, Mina Sirdal 3, Kristina Poulsen 3, Sonja Sirdal 2 og Tora Eliasen 2
