Gunvør Balle
løgtingskvinna
Munnligur fyrispurningur
til
Johan Dahl, landsstýrismann í vinnumálum
Viðvíkjandi filmsvinnu
1. Ætlar Vinnumálaráðið at raðfesta filmsvinnuna í vinnupolitikkinum?
2. Um ja, hvussu skal hetta gerast?
3. Samstarva Mentamálaráðið og Vinnumálaráðið um at menna filmslist og filmsvinnu?
Viðmerkingar:
Tá álitið frá Klippfisk varð handað í vár, segði landsstýrismaðurin í vinnumálum, at “kreativu vinnurnar hava ómetaliga stóran týdning fyri okkara framtíð, fyri okkara vinnuligu vakstrarmøguleikar og fyri at gera Føroyar til eitt land, sum dregur fólk at sær.” Og at “hetta tilmælið verður ikki lagt í skuffuna. Tað verður beinanvegin tikið við í arbeiðinum við vinnupolitikkinum”.
Álitið setir tað mál, at um 10 ár skal ein spælifilmur framleiðast um árið í Føroyum, og 50 heiltíðar størv skulu vera í vinnuni. Fyri at náa hesum máli var mælt til at:
– skattalætti ella stuðul verður latin útlendskum filmsframleiðarum, ið taka film upp í Føroyum
– skipa ein føroyskan filmsgrunn
– grunnurin skal byrja við 1,5 mió um árið, men vaksa til 5 mió eftir 7 árum
– stuðla undir at fáa eitt afturvendandi føroyskt tiltak, t.d. filmfestival, har Føroyar verða settar á kortið hjá filmsvinnuni í útlondum.
Viðmerkingar
Í fíggjarlógaruppskotinum hevur landsstýrismaðurin í mentamálum hækkað játtanina til Mentanargrunnin aftur við einari millión í 2014, harav nakað skal markast filmslistini. Spurningurin er so, um tað merkir, at Vinnu- og Mentamálaráðið hava sett sær yvirskipað og langtrøkkandi mál um at menna eina veruliga filmsvinnu.
Á Løgtingi, 8. oktober 2013
Gunvør Balle
