Við einum skallara í 63. minutti skoraði Atli Gregersen einasta málið í dystinum í Sarpugerði Flaggdagskvøldið, og sostatt vann Víkingur grannauppgerðina við meistararnar úr NSÍ.
Tey mundu hanga við høvdinum á Runavíkarleiðini fríggjakvøldið eftir ósigurin í Gøtu, har føroyameistararnir høvdu ilt við at finna fram tað flótandi spælið, sum er so eyðkent fyri teir.
Serliga í fyrra hálvleiki hevði ljósabláa heimaliðið leikliga yvirtakið, og tá so gestirnir tóku seg saman eftir steðgin fyri at fáa hol á málskjótingina, fingu teir ístaðin eitt mál ímóti sær.
Tað var evnaríki Atli Gregersen, sum spælir í miðverjuni hjá Víkingi, ið gjørdi hetta málið í 63. minutti, eftir uppspæl frá Magnusi Skoralíð, sum sendi eitt fríspark inn fyri NSÍ-málið.
Málið hjá Atla, sum hann gjørdi við høvdinum, skuldi vísa seg at verða sigursmálið í dystinum, tí hóast NSÍ royndi at trýsta í endanum av dystinum, so var tað ov lítið og ov seint hjá teimum.
Sostatt feldi Víkingur meistaran hetta Flaggdagskvøldið, ein flottur sigur, sum gevur nýstovnaðu víkingunum úr Leirvík og Gøtu góðan vind í seglini.
Hinvegin kemur hesin ósigurin illa við hjá NSÍ, sum helst ikki skal missa ov nógv fet í mun til hini oddaliðini, um teir skulu hava vónir um at endurvinna FM-heitið í ár.
