Íslendingar hava sagt nei til at taka upp aftur samráðingarnar um ES-limaskap. Á fólkaatkvøðuni leygardagin atkvøddu 52,8 prosent ímóti, meðan 47,2 prosent søgdu ja. Valluttøkan var heili 82,5 prosent.
Tað var serliga óttin fyri at missa ræðið á egnum fiskimiðum, sum gjørdi munin. Fiskivinnan stendur fyri umleið 40 prosentum av vøruútflutninginum í Íslandi, og mótstøðufólkini ávaraðu um, at ES-limaskapur kundi avmarkað íslendska ræðið á eini av týdningarmestu náttúrutilfeinginum hjá landinum.
Úrslitið er eisini áhugavert úr føroyskum sjónarhorni. Føroyar hava eins og Ísland valt at standa uttanfyri ES, samstundis sum vit hava tætt samband við ES gjøgnum millum annað fiskiveiðisáttmála og fríhandil. Spurningurin um, hvussu nógv eitt lítið fiskivinnuland skal lata frá sær av ræði á sínum tilfeingi fyri at fáa tættari evropeiskt samstarv, er tí framvegis eins viðkomandi í Føroyum sum í Íslandi.
Íslendska fólkið hevur nú sagt, at fiskurin og sjálvræðið skulu vera á íslendskum hondum. Tað er ein niðurstøða, sum eisini verður løgd til merkis í Føroyum.
