Leiðslan í Mjølni hevur verið í gongd við fyrireikingarnar til komandi kappingarár í eina tíð. Ein partur er venjaraspurningurin og ein annar partur snýr seg um, hvørjar leikarar felagið hevur at ráða yvir. Mjølnir hevur sett ein útlendskan leikandi venjara, sum kemur at hava ein týðandi leiklut í felagnum komandi ár.

Philip ella Phil, sum hann verður kallaður, er 21 ár og er ættaður úr Melbourne í Australia. Hann hevur leikt professionelt í Danmark, Fraklandi og Ísrael. Og komandi kappingarár leikar hann fyri besta mansliðið hjá Mjølnir.

– Nevndin ynskti at styrkja um alt felagið, og tað meta vit, at Phil kann hjálpa okkum við. Fyri tað fyrsta er hann ein góður leikari og fer at styrkja um okkara besta manslið. Harnæst fer hann at leggja venjingarnar til rættis í ungdómsdeildini, saman við øllum okkara dugnaligu og eldhugaðu venjarum, sigur Jóhann Lützen, formaður í Mjølni.

– Eg haldi at hetta er ein fantastiskur møguleiki at hjálpa við at lyfta felagið fram. Eg havi leikt í Danmark fyrr og eg elski skandinaviska lívsstílin. Við at koma til Klaksvíkar, so fái eg sameint hesi bæði og tað er eri eg sera fegin um. Øll kring felagið hava tikið so væl ímóti mær og Klaksvík er eitt tað vakrasta staðið eg havi sæð, so hetta er perfekt, sigur Phil við Norðlýsið.

Landskappingarnar í flogbólti byrja í oktober, og uppstarturin byrjar fyrst í august.