Ongin verkætlan seinka !
Góði tit í Megd,í lesarabrævið í miðlunum tulka tit avsetingarnar í fíggjarlógini fyri 2019 soleiðis, at ov lítið av peningi er avsett til Sambýli á Mýruni og Bú- og umlættingarheimið til børn og ung við autismu, tit óttast fyri at peningur er settur av til aðrar verkætlanir, sum kann gera, at bústaðir til fólk við avbjóðingum møguliga verða útsettir í fleiri ár. Síðan spyrja tit, hvat ið eg sum landsstýriskvinna í almannamálum hugsi at gera við hetta.
Hesar báðar verkætlaninar, Sambýli á Mýruni og Bú og umlættingarheimið til børn og ung við autismu, saman við Barnaheiminum hava allatíðina verið raðfestar høgt og tað eru tær framvegis. Arbeiðið við hesum trimum verkætlanum er í gongd, og tað ið er sett av í fíggjarlógini er tann peningur, ið Landvserk metir verða brúktir komandi ár til hesar verkætlannir.
Status viðvíkjandi bú- og umlættingarheiminum til børn og ung við autismu er, at verkætlanin er útboðin og samráðingar eru um sáttmála. Væntandi verður sáttmálin komin undir land í hesari vikuni.
Status viðvíkjandi Mýruni er, at ráðgevingin er boðin út, sí her : http://www.landsverk.fo/fo-fo/sambyli-a-myruni-i-hoyvik og tá ið arbeiðið við at innrættað Torfinnsgøtu er liugt, síðst í hesum árinum, verður farið undir at ríva Mýruna niður og gera klárt at byggja nýtt.
Tølini ið eru avsett eru metingar útfrá dagsins vitan, er tað so, at ein verkætlan gongur skjótari enn væntað, ber til at flyta pening millum verkætlaninar. Samlaða játtanin til bústovnar er 41 mió komandi ár, 46 mió í 2020 45 mió í 2021 og 50 mió í 2022.
Samanumtikið, eru vit framvegis samd um at byggja og at byggja so skjótt sum til ber. Eg vóni og vænti, at arbeiðið ferð at ganga skjótt og væl og mín lutur skal ikki liggja eftir at fáa hesar verkætlanir framdar, tí tað hevur sera stóran týdning fyri meg, sum landsstýriskvinna í almannamálum, at útvega nógvar góðar nýmótans bústaðir, bygdir júst til tann tørv, ið hesir borgarar hava.
Vinarliga Eyðgunn Samuelsen, landstýriskvinna í almannamálum.